روآيــهـ..{آلدنيــآ غريبهـ}..

طل خالد من الشباك وكان باين ان الطياره فوق الحدود السعوديه جلس خالد يتامل الاراضي تحته اللي كانت اغلبها صحاري وشوي شوي بانت ملامح المدن كل مامر من عند مدينه اتضح معلم من معالمها مثلا جده شاف نافوره الملك فهد والقصيم ميزها من المسطحات الخضراء وكثير مدن مر فوقها بس ماميزها اخيرا اتضحت الرؤيا حنا اللحين نحلق فوق سماء الرياض كل شئ يدل انها الرياض الانوار اللي فيها وكبر مساحتها وبعض المعالم المعروفه الحركه اللي ماتهدأ ابدا " طبعا هو مايشوفها بالعين المجرده لان المسافه مره بعيد بس يتخيلها" فيها صدق من سماها المدينه التي لاتنام.. المدينه الحالمه الجميله اللي احتضنتنا سنين حن لها خالد اشتاق لها ومن يلومه بحب الرياض هاذي الكل تغنى فيها
محمد عبدو يقول" قلبي تعلق بالرياض حبا ورثته من الجدود"
ونبيل شعيل قال فيها" ألا يااهل الرياض اول غرامي.."
التفت على مها شكلها المسكينه تعبت من طول الرحله ونامت..
تذكر ان معه دفتر صغير طلعه وجلس يخربط فيه ويعبر عن حنينه وشوقه لاحلى المدن..

الرياض الليله اجمل
الرياض الليله اكمل...
وفي الرياض الليله
احساسي خرافي
كنت احس اف.. برد لكن..
اشعر اني حيل دافي
للرياض العشق الاول والجديد
والقريب من المعاني والبعيد
والعطر واحلى الهدايا..
والجواهر
والقصيد...
الرياض الليله اجمل
الرياض الليله اكمل...
وان بغيت الصدق عاد..
الرياض اجمل واكمل..
الرياض الليله حاله
مايفسرها كلام
رفرفه شعر وهديل..
عشق واطفال وحمام
اعذريني..
ماقدرت استوعبك
يااحلى المدن
ولاتخيلتك كذا
مزيج من روعه وفن
اغفري جهلي دخيلك
سامحني
ويالله قومي صافحيني
وصدقيني
صدقيني يوم اقلك
شفتك اجمل
شفتك اكمل
شفتك الليله وديعه طاهره
تمتلى عفه وبياض
واحتضنتك يالرياض

القصيده للشاعر.." طلال حمزه"




كلهم جالسين بالصاله وعبير تطل عليهم من كاونتر المطبخ..
عبير: ريما انتبهي لعيالي..
ريما: عبير مالي خلق اللحين يصيحون واتورط فيهم..
ام نواف: لاتخافين أنا عندهم
ريما: لوانك مخليتني اسميهم كان مسكتهم
عبير: تكفين انتي والاسماء اللي اخترتيها
نواف: ليه وش كانت بتسميهم؟؟..
ام نواف: كانت مزعجتنا تبي تسميهم طلال ودلال
نواف: ههههههههههههههههه احلى ياسجع ماتلعبين المفروض أي تؤام ينولد بالسعوديه يوكلونك مهمه تسميتهم تختارين لهم اسماء على كيف كيفك..
ريما: هم يحصلون اصلا أنا اسمي عيالهم..
فارس: ريما بالله انتي كم عمرك؟؟
ريما: ليه بتجيب لي هديه.. مو اليوم عيد ميلادي..
ابونواف: عبير وش عندك انتي بالمطبخ تعالي اجلسي معنا..
ريما: صح وش تسوين؟؟..
عبير: اصلح عصير لعيالي..
نواف: عبير تكفين مشتهي فروت سلاط
عبير: ايوووووووو وأنت يافارس وش تبي بعد..
فارس: لامابي شئ بطلع..
نواف: وين بتروح؟؟
فارس: بلعب كوره مع العيال..
ابو نواف وهو قايم: لاتتاخر.. وانا بعد بروح عندي كم شغله
عبير بالمطبخ طلعت الفواكه من الثلاجه وجلست تقشر التفاح والفراوله والموز والخوخ وحطتهم بالخلاط وحطت عليهم عصير ليمون وبرتقال وشويه سكر وشغلت الخلاط..
عيالها اول ماسمعوا الصوت انفجعوا وجلسوا يصيحون..
ريما وهي تصارخ: هبلتي فيهم..
نواف: وانتي كملتي الناقص بصوتك..
ام نواف وهي تشيل فهد: بس ياحبيبي بس.. بسم الله عليك
جت عبير وشالت شهد وباستها وجلست تسمي عليها: ياعمري ياناس
ام نواف: خذي ولدك أنا بروح اكلم بالتلفون..
حطت عبير عيالها عند ريما ونواف وراحت تكمل شغلها بالمطبخ وبعد شوي طلعت لهم ومعها صينيه فيها ثلاث كاسات عصير مشكل ورضاعتين فيها عصير لعيالها.. ووراها الشغاله جايبه الفروت سلاط لنواف..
نواف وهو ياكل: عبير ماحطيتي فيها سكر
عبير وهي ماسكه شهد ترضعها العصير: الااااااا بس يمكن ماكثرت..
ريما: اشرب العصير لذيذ..
دق جوال ريما كان راكان ردت عليه بعفويه وماانتبهت ان اخوانها جالسين لانها متعوده على هالاسلوب..
ريما: هلا حبيبي..
اخوانها يطالعونها وهم مفتحين عيونهم..
ريما انتبهت وانقلب لون وجهها وكملت مكالمتها: وش اخبارك؟؟..
عبير تطالع ريما وهي تكلم نواف: اختك بتخربني..
نواف بابتسامه وهو يطالع ريما: مو بس انتي كلنا..
ريما وترقع لعمرها: لحظه شوي.. وتلتفت لاخوانها وش فيكم؟؟..
نواف: اعصابك شوي شوي هدئ الوضع ترى امي تحبني تخاف على...
عبير: هههههههههههههههههه
انحرجت ريما منهم وطلعت تكمل مكالمتها فوق..
عبير: هههههههههه استحت الاخت..
نواف: واثقه بقوووه انها جالسه اللحالها..
عبير: وش صار على مشروعك المحل؟؟..
نواف: الحمدلله كل شئ تمام واللحين يشتغلون فيه يعني عالاسبوع الجاي يكون جاهز..
عبير: الحمدلله يعني اللحين مالك حجه لازم تتزوج..
نواف ويطالع عبير بنظرات اسف: ياعبير قولي لي بالله من هاذي اللي بترضى تاخذ خريج سجون إلا كان فيها بلاوي الدنيا..
عبير: لاتقول كذا أنت الف وحده تتمناك..
نواف: عطيني وحده تتمناني..
عبير: والله فيه أنت بس قل اخطبوا لي وأنت بتلاقي..
سكت نواف ومارد عليها..
عبير: كيفك براحتك أنا بطلع انوم عيالي..
شالت شهد ونادت الشغاله تشيل فهد وراحت فوق لغرفتها..





بعد ماطلعت غرفتها نومت عيالها وطفت النور وولعت الابجوره عشان لمن يصحون مايخافون من الظلام.. سمعت مسج فتحته وهي تقول يااااااااه من زمان عن المسجات لهيت مع عيالي ونسيت الناس فتحته وتفأجات بالمرسل..

" ياعيوني ضاقت بي الدنيا بدونك... وبااحرجك هي عادي الدنيا بدوني؟؟.."

سعود مرسل لي يااااااااه إلا الان مانساني حست اطرافها صارت بارده وكل قطعه بجمها تجمدت مو عارفه وش سبب هالشعور.. أنا احبه بس ماتوقعت هو باقي على حبي توقعت خلاص نسى عبير خاصه بعد ماصارت عبير ام .. بس لاتنسين ان هو ماتزوج إلا الان وهذا اكبر دليل انه يحبك.. لا لا هذا مو شرط يمكنه خلاص مايبي يتزوج مايبي يظلم بنت الناس معه.. لكن كان بامكانه يتزوج وحده عندها عيال مثل نجلاء صديقتي..
افكار متضاربه تدور براسها وكل فكره تكذب وتمحي اللي قبلها..
يارب وش ارد عليه واقوله اقوله اني احبك اقوله مانسيتك لحظه وحده طول الايام اللي راحت اقوله أنت كنت بكياني وبروحي حتى باللحظات الخاصه اللي بحياتي التفتت جهه عيالها اللي كانوا جانبها ولا اقولك تمنيتك تكون ابوهم؟؟؟!!!!!!!..
وش ارد عليه وش اقوله؟؟!!
شغلت الراديو تبي تبعد شوي من القلق اللي كانت تحس فيه.. كانت اجزائها كلها تنتفض كل شئ فيها يعبر عنها بهاللحظه مو عارفه وش تقول ؟؟..
يارب احبه بس جرحني ياترى ياسعود تتوقع اني احبك ومشاعري نفسها ماتغيرت تجاهك ولا مرسل هالمسج تبي تقضى على اخر ذره امل بداخلك؟؟..
في خضم هذه الافكار جت اغنيه شدت انتباهها تصنمت مكانها وجلست تسمع الاغنيه بكل اهتمام سبحان الله كانها لي وش دراهم اني افكر بهالموضوع ؟؟.. كيف عرفوا ان أنا عايشه بدوامه؟؟..
كانت الاغنيه الراشد الماجد..

" جاني حبيبي من بعد غيبه سنين.. يقول سامحني برد لمكاني ...."

قطع عليها صمتها صوت ولدها فهد يصيح شالته وحطته بحضنها وجلست تهز فيه وبالها بمكان ثاني..
سؤالك قوي ياسعود وجرئ بنفس الوقت..
مدري يارب اسامحه واقوله اني فقدتك..
ولا اقوله مثل ماقال اصيل.. بتشوف ناس وتحب ناس وتنسى واكون بدنيتك واحد من الناس..

اخيرا حددت موقفها وقررت ترسله مسج..

وهو له اكثر من ساعه يترقب الرد خايف يكون ردها قاسي ويجرحه مايدري وش يسوي لو رفضت وجوده بحياتها مره ثانيه .. مو بعيده ينتحر خلاص مل من حياته من دونها.. استغفر ربه ورفع يده يارب أنت الوحيد العالم كيف الايام اللي راحت مرت على يارب هونها وخل الجاي احسن..
اااااااااه تكفين ياعبير لاتضيقين صدري تكفين يانور هالدنيا ارجعي لي كل شئ بعدك عفته حتى شغلى نقلته برى الرياض ولا ارتحت.. راحتى هي انتي هي انتي وبس..
ياللــــــــه لهالدرجه هي شايفه السؤال صعب وماتقدر ترد عليه؟؟..
اخيرا سمع نغمه المسج..

" احس اني بلا حسك مثل ديره بليا ناس...
تخيل كيف يعيش انسان بوحشه شوارعها؟؟؟!!!!!..."

ماتتصورون كيف عاش هاللحظه قلمي مو راضي يوصف شعوره اليوم هو اسعد انسان.. عبير قلبي ودنيتي كلها تقول انها فاقدتني مثل ماانا فاقدها..
يعني زواجها كان انتقام منى تبي ترد جزء من كرامتها..
اااااه ياعبير ليه قسيتي على وعلى نفسك أنا هنت عليك.. بس كيف هانت عليك نفسك؟؟؟!!!
…………………..
عبير وحبها لسعود اللي توقعناه مات مع الاحداث والحياه القاسيه رجع ينبض من جديد ياترى عبير راح تسامحه وترجع له وعيالها وش موقعهم من هالمعمعه اللي بينهم؟؟

نواف والحياه الجديدة اللي يعيشها الان ونظره المجتمع القاسيه له هل راح تكون عائق امام اماله وطموحه وحتى ارتباطه بالمستقبل؟؟

ريما وحبها راكان وتاجيل الزواج هل هذا من صالحها ولا راح تندم على هالشئ؟؟

خالد ومها وش نوع العلاقه اللي بينهم وهل الايام كفيله بزرع حب مها بقلب خالد؟؟

ساره صوره البنت المرحه الفرفوشه بدت تختفي فيها ياترى هل الحياه تجعل من الانسان في ظرف فتره انسان اخر؟؟

مشاري جالس يدفع ثمن استهتاره بعقاب حسي له من رب العالمين صار يحسد الناس اللي حوالينه ان سمع انهم متزوجين ومبسوطين.. نفسه ياسس بيت بس ماضيه يتجدد قدامه بصوره أي وحده يفكر يرتبط فيها إلى متى يامشاري؟؟!!!!!!!!!!

الجزء الثاني والثلاثون والاخير
,,,,,,,,,,,,,,,,,,,,,,,,,,,,
ام مشاري: ساره .. ســـــــاره
ساره وهي نازله من الدرج: سمي يما
ام مشاري: امممم.. الصراحه في ناس جايين بكره بيشوفونك
ساره وهي متفاجئه: يشوفوني؟؟..
ام مشاري: بيشوفونك واذا عجبتيهم بيخطبونك لولدهم..
ساره: وليه سياره أنا ولامحل عشان يجون يتفرجون؟؟.. بعدين منهم الناس أنا اعرفهم؟؟..
ام مشاري: جاين لنا عن طريق خالتك.. هم سالوها تعرفين بنات قالت لهم ساره بنت اختي..
ساره: طيب أنا ماوافقت عشان يجون ويشوفوني
ام مشاري: خالتك تقول انه رجال زين يشتغل مدرس واهله ناس طيبين انتي ماعليك البسي وانزلي وبيصير خير..
ساره متردده: متى بيجون؟؟..
ام مشاري: بكره بعد المغرب..... أنا قبل شوي علمت ابوك وقال الله يكتب اللي فيه الخير..
ساره: صح يما صديقاتي وبنات عمي كلهم تزوجوا بس هذا مايعني اني اتزوج أي احد
ام مشاري وتحط يدها على صدرها: وحنا قلنا لك تزوجي هندي ولا عامل نظافه؟؟..
ساره: لابس طريقتهم غريبه بيجون يشوفون من غير ماياخذون رايي
ام مشاري: خلاص ماتبين اقولهم لاتجون؟؟
ساره وتحس انها فرصه وجت لحد عندها عشان تطلع من الجو الكيئب اللي هي فيه: لا لا يما خليهم يجون اذا هو نصيبي بخذه..
ارتاحت ام مشاري لكلام بنتها لانها ماتبي تتفشل قدام الناس وهي عاطيتهم موعد انهم يجون بكره
ام مشاري تحاول تغير الموضوع: اختك تقول انهم اليوم بيجون.. غريبه مااتصلت
ساره: اكيد بيجون تعبانين بكره بتمرنا
ام مشاري: ياصلون بالسلامه ان شاء الله
ساره: صح يماااا ريما بتجي اليوم ابي اغراض من السوبر ماركت
ام مشاري: اكتبي الاغراض بورقه وخلى السواق يجيبهم
.
.
.
وبعد ساعه ريما عندهم بالبيت
ساره: الكليه قرف
ريما: ليه وين شلتك راحواااااا؟؟..
ساره: ياشيخه البنات يرفعون الضغط اصلا أنا مااجلس معهم إلا اضيع وقت..
وحده نصابه اذا ضاق صدرك اجلسي معها تسمعك مالايخطر على بالك..فاتك انتي بعد الاجازه جايه تقول سافرت سويسرا قلت بقلبي انتي الخرطوم تخب عليك... ووحده مصلحجيه ماتدق إلا ان كانت تبي شئ.. ذاك اليوم دقت على تسأل عن ملازمي كامله ولا لا.. يوم قلت لها ناقصه قالت امي تبي التلفون اكلمك بعدين الظاهر انها نست انها تكلمني من جوالها...
ريما: هههههههههههههههههه
ساره: حتى الدراسه ملل
ريما: بعذرك داخله قسم أي كلام المفروض يكون عندك طموح
ساره: ياشيخه هم زين منهم قبلوني
ريما: بس حلووو الواحد يحس انه داخل تخصص له فايده... شوفي راكان بعد عمري طبيب تحسين كشخه لما اقوول للناس زوجي طبيب
سارة تستهبل: ريما راعي مشاعري أنا ماتزوجت لاتقعدين تتكلمين قدامي
ريما: ههههههههههههههههههههههههههه
ساره: ايه اضحكي وش عليك تطنزين علي
ريما: مااضحك عليك...
ساره: اجل وش فيك؟؟
ريما وهي مو قادره تتكلم من الضحك: تذكرين سالفه مي يوم زواجها.....
ساره: رهيبه خربتها ماعندها وقت
ريما وهي مستمره بالضحك: مسكين زوجها خاف منها
ساره وتمسح دموعها: مصرقعه هالبنت
ريما: ماودي اضحك اخاف ربي يبلاني واصير مثلها
ساره: اللحين وش اخبارها؟؟..
ريما: مبسوطه ماعليها
ساره: ياحليلها أنا مااذكرها زين شفتها مره عندك بالبيت
ريما: وش اخبار مها؟؟..
ساره: تمام ماعليها موصيتها تجيب لي شنطه شانيل الجديدة والله مدري عنها شكلها بتنسى
ريما: مو مشكله اذا ماجابت لك اشتريها من هنا الاسبوع اللي راح رحت باريس قاليري شناطهم خطيره اخذت لي شنطه ديور بس مره صغيره...
ساره: لكن الشناط من برى تكون ارخص من هنا
دق جوال ريما...
ريما: اوووووش هذا راكان
ساره: طيب واذا؟؟..
ريما: الووو
راكان: هلا وغلا... وحشتيني
ريما: ماتشوف وحش.. كيفك؟؟
راكان: بخير دامي اسمع صوتك
ريما: مااقدر أنا عالكلام الحلووو حبه حبه علي...
راكان يغني: أنا مو ولهان أنا.. أنا مو تعبان أنا.. أنا دنيا من الوله راحتها ايديك
ريما منحرجه وتحاول تضيع الموضوع: راكان الله يستر لايكون احد مراقب الخط اللحين يصكونك عين على ذا الصوت
راكان: هههههههههههههههه
ريما: راكان أنا عند ساره اللحين اذا رجعت البيت كلمتك...
راكان: اوكي بس مو ترجعين متاخر وماتدقين انتظرك... ماراح انام لمن اسمع صوتك..
ريما بابتسامه: ابشر من عيوني
راكان: انتبهي لنفسك
ريما: وأنت بعد.. مع السلامه
راكان: مع السلامه

بعد ماقفلت ريما ...
ساره: ريما تحبينه؟؟..
ريما غمضت عيونها وابتسمت: مووووووت ياساره مووت
ساره: طيب هو يحبك مثل ماتحبينه؟؟..
ريما: تصدقين هو يبين لي انه يحبني اكثر مني أنا قدامه اسوى نفسي ثقيله وعادي عندي بس بالحقيقه احبه موت..
ساره: يابخته فيك
ريما: قولي امييييين
ساره: اميييييين..
ريما: عسى الله يوفقك ويسعدك ويسخر لك الزوج الطيب وملائكه السماء وسكان الارض
ساره بابتسامه: هههههههههههه امين.. صايره كريمه مختار مو باقي إلا تقولين يارب يجعلك في كل خطوه سلام..
ريما: ههههههههههههههههه... بس تصدقين في شئ مضيق صدري..
ساره: وشوو
ريما: راكان حلووو مره لدرجه احيانا احس انه احلى مني بكثيييير يعني يغطي علي
ساره: هو من ناحيه حلو حلو ويخقق بعد...
ريما: هيييييي هيييييييي انتي لاتقعدين تتغزلين بزوجي قدامي...
ساره: طيب خليني اكمل كلامي
ريما: لا خلاص غيري الموضوع..
ساره وهي تضحك: مره قريت بالمجله مقوله مره حلوه اعجبتني...
ريما: وشييييي؟؟!!
ساره: يقولون" الرجل الشرقي لايحب زوجته ولايتزوج حبيبته "
ريما: يمكن الكلام فيه نوع من الصحه بس مايعمم عالكل
ساره: ليش دايم نسمع قصص اللي يتزوجون عن حب اول زواجهم يطيرون ببعض بعدين بعد فتره في الغالب الرجال يتغير ويمل....
ريما: بس في المقابل ياساره في ناس الحب مايجي بينهم إلا بعد الزواج

سعود من بعد ذاك اليوم اللي ارسل لعبير حس ان روحه ردت له لان كلمات قليله منها حركت فيه اشياء كثيرة وخلته يحس ان الحياه لها قيمه...
احبك ياعبير ولاادري كيف عشت سنتين من دونك الدنيا من غيرك ماتسوى
جلس يفكر بينه وبين نفسه كيف يتقرب منها اكثر هو قدر لها شعورها الايام اللي راحت انها انثى وانجرحت كرامتها وحبت ترد ولو جزء بسيط منها بس احساسي يقولي انها طول الفتره اللي راحت ماكانت سعيده...
وش اسوى اللحين ابي ارجعها ابيها ترجع زوجه لي وكل شئ يصير مثل اول واحسن بس ماراح اقدم على هالخطوه إلا اذا تاكدت من مشاعرها تجاههي او بالاصح اذا عطتني
الضوء الاخضر بالرجوع ماابي انحرج مع عمي وابوي مره ثانيه ودي لمن اروح اكون واثق من حبها لي وتمسكها فيني...

صار لي اسبوع من ارسلت لها مسج وهي ولا حس ولاخبر شكلها تبيني أنا اللي اتحرك وتكون بادره الصلح مني... ارسل لها

" هجرك اللي ذبحني ويش اسوى به؟؟!!
كل ماقلت ابنسى زاد تذكاره....
كان طفل بصدري وانتثر شيبه
هجرك اللي جرحني وش هي اعذاره؟!! "


عبير كانت جالسه مع اهلها تتقهوى يوم سمعت نغمه المسج فتحته لقته منه ماقدرت تكمل الجلسه مع اهلها وصت امها على عيالها وطلعت غرفتها
انفاسها بدت تتزايد بس كان توترها اقل من المره اللي راحت حمدت ربها بسرها ان في انسان شاريها بعيونه ومافرط فيها..
بس اخاف مشاعري تتبدل واكون مو قد الكلام
اخاف أنا بين يوم وليله اصير متناقضه بافكاري
ماودي اجرحك ياسعود كفايه اللي شفته بدنيتك ماابي اصير أنا والزمن عليك
احبك ياسعود وربي وحده العالم...

فتحت جوالها على انشاء رساله وكتبت فيها...

" هلا باللي فقدته حيل وقلبي فيه شاغلني
ذبحني صدق بغيابه... وفيه الشوق جنني
احسبه ضيع دروبي ولقى غيري وبدلني
اثاري قلبه حنين بوفاه دوم يغلبني "





نواف هالاسبوع افتتح محله كان موقعه مره خطير وهو متفائل خير بهالمشروع خلى ابوه يحظر يوم الافتتاح عشان يتبارك المحل على قولته.. امه دعت له ربي يوفقه ويسعده بعد كل اللي شافه بدنياه..
توه راجع من المحل يحس انه مرهق...
نواف: السلام عليكم
الكل: وعليكم السلام
ام نواف: الله يعطيك العافيه
نواف: الله يعافيك
ابو نواف: خلص دوامك
نواف: لاوالله تعبت وقلت للعامل بعد ساعه قفل المحل
عبير: نواف نفسي اروح المحل اتفرج
ريما: حتى أنا
ابونواف: والله المحل حلوووو وديكوراته راقيه مره
فارس وصوته بدى يتغير: والله صادق يبا حركه المحل
نواف: مو مشكله اذا مره كان فاضي دقيت عليكم تجون..
ام نواف: خلاص الحمدلله المحل وطاح همه ماباقي إلا ندور لك بنت الحلال
نواف: يصير خير
عبير: صادقه امي يانواف شف كم عمرك
ابونواف: اهلك يبون يفرحون فيك..
فارس: أنا شكلي بتزوج وهو توه..
نواف: صح عندكم فارس انتظروه يكبر وافرحوا فيه
ريما: أنا عندي لكم وحده خطيره
ام نواف: من هي؟؟
ريما: خلود صديقتي
ام نواف: صح خلود كيف ماجت على بالي والله اني احب ذا البنت
عبير: ياحليلها خلود
ريما: ترى أنا واعدتها اجيبها الرياض
نواف رافع حاجبه: لاوالله واي سطحه بتنقلها
(السطحه هي الشاحنه الكبيره اللي تنقل السيارات)
عبير: ههههههههههه
ام نواف: والله ان خلود شيخه البنات ماراح تلاقي مثلها
نواف وهو قايم: اللحين أنا تعبان بطلع انام بعدين يصير خير





من بكره جت مها عند اهلها اول مادخلت استقبلتها ساره ضمتها وجلست تصيح وحتى امها خنقتها العبره فرحه برجوع بنتها صح انها ماطولت بالسفر بس هاذي بنتهم واكيييد فقدوها..
مها كان وجهها منور ويشع بالسعاده واضح عليها الراحه النفسيه...
مها وهي تمسح دموعها: ساره وين اللي تقول متى تتزوجين عشان افتك منك..
ساره تحاول تكابر: والله أنا فرحانه الغرفه صارت لي اللحالي.. بس امي قالت لي اذا جت اختك صيحي عشان تفرح...
ام مشاري: خلى عنك بس والله انها مزعجتنا اشتقت لمها اشتقت لمها
مها: وش اخباركم يمااا؟؟؟... ابوي وينه مااشوفه؟؟..
ساره: ابوي طالع؟؟
ام مشاري: خالد وينه مانزل؟؟
مها: عنده مشوار يقول ساعه ويجي يسلم عليكم
ساره: وش اخبار سفرتكم؟؟..
مها: والله حلووووه باريس مره انبسطنا
ام مشاري: اهم شئ راحه البال لوماتسافرون
مها: صادقه يماااااااا
ساره: متى وصلتوووو؟؟
مها: اليوم الصبح
ام مشاري: روحي البسي ياساره بعدين تعالي لاختك ماراح تطير
ساره: تونا بدري
مها: ليش تلبس بتطلع؟؟..
ام مشاري بابتسامه: لا في ناس بيجون يشوفونها اليوم
مها: احلىىىىىى ساره ماتلعبين
ساره: ليش مباراه هي؟؟؟..
وجلسوا مع بعض يسولفون ويضحكون ومها تحكي لهم كل شئ صار معها..
وساره ماقصرت استلمتها بالاسئله..





المغرب جووو الناس جلست معهم ام مشاري ومها وبعد نص ساعه دخلت ساره عليهم جلست معهم شوي وقعدووا يسالونها ويسولفون معها بالبدايه كانت مستحيه لكن شوي شوي تجرأت
ماطولت بالجلسه بعد ماخلصواا القهوه طلعت لغرفتها رفعت سماعه التلفون جلست تكلم وحده من صديقاتها بالكليه
وبعد ماراحوو الناس طلعت لها امها
ام مشاري: وش رايك فيهم؟؟؟..
ساره: عادييين مااقدر احكم عليهم من مره وحده
ام مشاري: صح كلامك
ساره: هم وش قالووا عني؟؟
ام مشاري: ماقالوا شئ.. تبينهم يتكلمون قدامي
دخلت عليهم مها: السلام عليكم
الكل: وعليكم السلام
مها: يما اشوفك جالسه مع ساره وتاركتني والمفروض اليوم يومي
ساره: حاسدتني على دقيقتين
ام مشاري: يلااااااا امشوا كلنا نجلس برى ابوكم على وصول
مها: حتى خالد دق على يقول بيمر اللحين يسلم عليكم
ساره: مبسوطه يامها مع خالد؟؟
مها باحراج: توني مالي اسبوعين متزوجه وبشهر عسل وكل وحده الفتره تكون من اجمل ايامها اكيد بكون مبسوطه
ام مشاري: الله يسعدك انتي واختك قولووو امين
الكل: امين
سمعوا صوت ابوهم ينادي طلعوا له كلهم سلمت مها عليه وجلس يسالها عن احوالها دق جوالها كان المتصل خالد يقولها انه عند الباب وساره ماتركتها تراقب تحركات اختها وتحاول تعرف مشاعرها تجاه خالد....
مها: يبا خالد برى
ابو مشاري: الله يحييه اللحين بروح له
ام مشاري: وانا بقوم اصلح لكم القهوه
وبعد ماقاموا اهلهم قربت ساره من مها وبدت تحقيقاتها وتحرياتها...
ساره بلكعاعه: مدري يامها احسك عادي ماتحبين خالد
مها: بالعكس احبه ياساره واتعب وانا اقولك احبه
ساره: مو باين
مها باستغراب: وش تبيني اسوى اصرخ مثلا عشان تصدقين
ساره: لااا امزح معك... بس احسه شايف نفسه ومايستاهل كل هالحب منك
مها: لا ياساره خالد اللي يتقرب منه ويعاشره اطيب منه مافيه حنون وقلبه طيب
ساره: هههههههههههه والله انتي وريما كل وحده مخليه زوجها فارس زمانه
مها: ايه صح ريما وش اخبارها؟؟؟..
ساره: غارقه ببحور احلامها





ام نواف استغلت فرصه وجوده بالبيت ودخلت عليه الغرفه
نواف بابتسامه: وش عندها الغاليه زايراتنا اليوم
ام نواف: اذا أنا غاليه صدق ريح قلبي
نواف: امري
ام نواف: خلني اخطب لك
نواف: صديقه ريما
ام نواف: ايه خلود
نواف: ومتاكده انهم بيوافقون يما أنا ماابي احرجك مع الناس
ام نواف: وليش ان شاء الله مايوافقون بيلاقون احسن منك
نواف: اللي تشوفينه يماااا... بس أنا اقوول خلى ريما تكلمها بالاول تجس نبضها بعدين نشوف وش يصير
ام نواف: على خير وانا بكلم اختك تكلمها
نواف: هااااا يما اللحين ارتحتي
ام نواف: الله يريح قلبك

راكان وريما طلعوا يتعشون برى بعد مااخذوا موافقه اهل ريما طول الطريق كانوا ساكتين ريما مرتبكه وخايفه بالتلفون عادي تاخذ راحتها وتتكلم بس مجرد ماتشوفه تنقلب انسانه ثانيه.. دخلوااا الركن الايطالي وجلسوا على طاوله كبيره شوي يمكن كانت لاربع اشخاص..
راكان: خلاص نزلي الطرحه مافي احد
ريما وهي تشيل الطرحه: ياربــــــي حـــــــر
(مع العلم ان الجووو كان بارد بس حركات وتصريفات بنات.. يعني أي واحد تقوله خطيبته او زوجته حـــــــــــرررر على طول يعرف انها منحرجه )
راكان مفتح عيونه: حـــــــر!!!... وش لابسه انتي؟؟..
ريما: هااااااااا .. ايه شكلي مثقله اللبس بيتنا كان بارد...
راكان: طيب فكي قطعه من ملابسك اذا حرانه
ريما وكنها خافت: لااااااا لاااا خلاص الجو حلووو
راكان: اشتقت لك ياريما
ريما بابتسامه: تشتاق لك العافيه
وبعد لحظات صمت....
ريما: وش فيك تطالع؟؟..
راكان: اتامل فيك تصدقين كل مالك وتحلوين... ترى مااجامل...
ريما: عيونك الحلوه...
راكان: طيب انتي وش رايك فيني؟؟.. حلووو اسدح البنات؟؟..
ريما تكلم نفسها حلوو وبس إلا تجنن تهبل...
راكان: وش فيك سكتي ؟؟.. ردي علي عجبتك ولا لا؟؟...
ريما: صراحه...
راكان: ايوه
ريما وماتبيه يشوف نفسه عليها: أنت مره عادي...
راكان تحطم: حتى انتي عاديه..
ريما: هههههههههه كل ذا عشاني قلت الصدق توك تقولي انتي حلوووه
راكان: ايييييييييه حلوه بعيوني أنا بس لكن الناس مدري عنهم..
ريما: يكفيني حلوووه بعيونك ولا الناس وش ابي فيهم
بعد ماقالت هالكلام تغير لون وجهها وماتدري كيف جتها الجرأه وتكلمت معه وجها لوجه اول مره تقوله كلام حلو وهو جالس معها
راكان: ياقلبي انااااا مااتحمل





الساعه 1:15 الليل..
مشاري راجع من برى لقى ساره سهرانه مانامت...
مشاري: وش عندك صاحيه إلا اللحين؟؟..
ساره وواصله حدها منه: كيفي
مشاري: لاتنافخين..
ساره: سهرانه اللحالي وقدام التلفزيون وجاي تتحرش فيني وش تبي؟؟..
مشاري: عادي سألت سؤال عادي...
ساره: اذا شفتني سهرانه بالشارع تكلم
طالعها مشاري بنظره وراح عنها دخل غرفته وهو مرررره طفشان.. وش فيها هاذي تنافخ على لاقيتني اصغر عيالها أنا عادي ماقلت لها شئ يزعل بس شكل هي نفسيتها تعبانه بعد ماتزوجت مها وتحط حرتها فيني أنا المفروض اكون لين معها اكثر من كذا احس اني قاسي عليها ماعمري جلست اسولف معها بس هي الله يهديها افكارها غريبه ومزاجها اغرب مافي امل تسمع مني كلمه.. لازم اغير اسلوبي معها ابي اكسبها اللحين مافي بالبيت غيرنا..
خليني انام بكره وراي دوام وبعدين يصير خير..





من بكره ام نواف طلبت من ريما تكلم خلود وتاخذ رايها بالموضوع قبل مايتقدمون رسمي للناس ريما ماكذبت خبر دقت عليها وجست نبضها والبنت ماكان عندها مانع وكيف تمانع وهي بتجي الرياض عند حبيبه قلبها وغير كذا هي من زمان مع ريما وعارفه نواف زين من كثر ماتتكلم عنه ودخوله السجن مااثر في قرارها لانها عارفه السالفه كامله من ريما...
بعد ماقفلت منها راحت بلغت امها بموافقه خلود المبدئيه فرحت امها وكلمت ابونواف بالموضوع وقررت تكلم ام البنت ويشوفون وش رايهم؟؟..





في الاستراحه نواف واخوياه اللي كانوا وفيين وماقصروا معه فتره دخوله بالسجن باستثناء كم واحد ماشافهم الابعد ماطلع والمشكله يسلمون عليه ويضحكون ولاكن شئ صار بعض الناس وقحين.. شين وقوي عين...
ثامر: الجو ربيع وش رايكم نروح كم يوم روضه التنهات
عبدالله: خلوها خميس وجمعه عشان الدوامات
فيصل: والله فكره اخر الاسبوع فاضين
نواف: أنا مااوعدكم مشغوووول لراسي
ماجد: وش عندك؟؟..
ثامر: على فكره مبروك افتتاح المحل
نواف: الله يبارك فيك.. والله اني من يوم فتحته اداوم من الصبح ومااطلع إلا بليل...
عبدالله: ماشاء من متى فتحت محل من ورانا تكلم علمنا...
فيصل: أنا ناوي امر هالاسبوع باذن الله اشوفه..
نواف: الله يحييك
ثامر: وش قلتوووا عالطلعه
ماجد: خل باقي العيال يجون ونشوف..
عبدالله: نواف محلك وش النشاط اللي تمارسه...؟؟.
نواف: الكترونيات وتصميم مواقع
ثامر: المشكله الرياض مليانه من هالمحلات ليتك شايف لك مشروع ثاني
نواف: محل مافيه بالرياض مافي إلا كان محل مخدرات
الكل: ههههههههههههههههههههه
فيصل: مخدرات مره وحده كان قلت ويسكي عالاقل
نواف: اندري عنه يقول محل مافيه بالرياض...
ماجد: وهو صادق نواف الرياض هنا أي شئ تفتحه تلاقي العالم كله طاحوا بنفس المشروع.. ياحب ذا الناس للتقليد...
ثامر: كله بجهه والمطاعم والمستشفيات بجهه.. قسم بالله اللي يجي هنا اول مره يحلف ان اهل الرياض ماعندهم مطابخ ببيوتهم..





المغرب مها مصلحه قهوه وجالسين يتقهون...
خالد: والله انك فنانه تعرفين تصلحين حلى
مها بابتسامه: مو مره تجارب
خالد: لاوالله لذيذ
مها: بالعافيه
لحظات صمت...
مها: خالد ودي اروح الصالون اقص شعري
خالد: لااااااا
مها: ليش؟؟..
خالد: كيفي زوجتي وابي شعرك طويل
مها: بس أنا ماراح اقصره بس اطرافه
خالد: لاء
مها سكتت وماردت عليه وهو لاحظ هالشئ...
خالد وهو قايم: ترى أنا مااقولك هالكلام سيطره ولافرد عضلات لاوالله أنا احب الشعر الطويل
مها بابتسامه: اول مره ادري انك تحب الشعر الطويل
خالد: ماجت مناسبه اني اتكلم
مها: وين بتروح؟؟
خالد: بروح عند سلطان تبين شئ
مها: ايه ودني عند اهلي على طريقك ماابي اجلس اللحالي بالبيت
خالد: اوكي بسرعه غيري ملابسك انتظرك
ركب السياره وبعد عشر دقايق لحقته مها وداها بيت اهلها ومر سلطان وراحواا الكوفي اللي متعودين يجتمعون فيه






وفي احد المقاهي كانوا خالد وسلطان جالسين..
خالد: وش فيك ضايق صدرك فلها
سلطان: ياشيخ رضينا بالهم والهم مارضى فينا كارفين ابو جدي بالدوام وساكت ماقلت شئ لكن اغيب يوم طايح كنت انفلونزا وجايب لهم تقرير طبي ويخصمون علي ليه...
خالد: هذا القطاع الخاص ياخذونك لحم ويرمونك عظم لازم تستحمل
سلطان: أنت ماشفتني اليوم سفلت فيهم وتهاوشت معهم مااظني اكمل معهم
خالد: الله يعين يارجال
سلطان: أنت وش اخبارك مع المدام؟؟..
خالد: ماشي الحال...
سلطان: يعني كيف مبسوط مرتاح ولا لا؟؟..
خالد: عادي البنت طيبه وحليوه وتوني مالي شهر معها ماامداني احكم عليها
سلطان: يعني معقوله فتره الملكه الطويله ماقربتكم من بعض...
خالد: أنت عارف الملكه كانت بظروف شينه وبعد مااجلنا الزواج صار احتكاكي فيها قليل
سلطان: يعني ماتنصحني اتزوج
خالد: بالعكس حلووو الزواج استقرار لكن لازم تكون ملتزم موتاخذ وحده وتلعب بحسبتها
سلطان: هااااااا مافي خبر حمل شئ؟؟..
خالد: وش قالوا لك قطاوه ولا ارانب باقل من شهر تحمل
سلطان: ههههههههههه







الليل الساعه 12:40
عبير بغرفتها عيالها نايمين جنبها وهي طفشانه مو راضي يجيها النوم وبنفس الوقت جايها شوق مو طبيعي لسعود قالت بنفسها هو دايم يرسلي اليوم أنا برسله واشوف وش بتكون رده فعله قعدت تقلب بجوالها بين المسجات لما لقت هالمسج وارسلته

" حاولت في قلبي وانا اقول بنساك
واعيش دنيا في حياتي جديده
واثر الغلا ماتعجبه غير دنياك
والقلب غيرك ماسكن وريده.. "


سعود كان توه طالع من الحمام ماخذ له شور شاف جواله لقى
الرسائل الوارده: 2

فتحهم كان الاول من الاتصالات
" عزيزي العميل لقد تم استلام المبلغ ونقدر لك تعاملك"
حتى بااصعب اللحظات ورانا ورانا الاتصالات
والمسج الثاني كان منها تفاجئ فتح عيونه وهو مو مصدق انها تنازلت وارسلت له من غير مايرسلها تنهد براحه وجلس عالسرير وقرر يسوي شئ مايخطر عالبال قال اليوم بيخربها ويدق عليها له سنتين صابر ويتعذب ولااحد حاس فيه قال بنفسه اليوم ابي اسمع صوتها وارتاح...
جلس يقلب بقائمه الجوال لمن وصل " قلبــــي " وكان هذا اسمها بجواله اتصل عليها..
عبير كانت ماسكه الجوال بيدها وفجأه دق يوم شافت اسمه ارتبكت مااقدر اوصف لكم شعورها ترددت ترد عليه ولا لا؟؟.. هي مشتاقه له مووت بس الموقف كان صعب عليها طوووووووووول يدق يدق وهي متردده واخيرا خافت ينقطع ضغطت الزر الاخضر وهي ساكته...
سعود: الوووو
عبير بهمس: ااا...اهلين
سعود: عبير..!!
عبير: ه.. هلا
سعود: وش اخبارك؟؟..
عبير: تمام وأنت كيفك؟؟..
سعود ويحس براحه: بخيييييييييييير
لحظات صمت...
سعود: عبير.. متضايقه من اتصالي؟!
عبير: لااااا
سعود: مدري احسك مو طبيعيه...
عبير وهي تنتفض: هااا.. لاعادي
سعود: يعني اقفل؟..
عبير وبنفسها اااااااااااااه أنا ماصدقت انك دقيت واللحين تقول بقفل حرام عليك..
سعود: عبير وين رحتي..
عبير: معك معك
سعود: أنا اسف عالازعاج شكلي ضايقتك..
عبير: لاوالله ماضايقتني بالعكس...
سعود حس من اسلوب عبير انها متقبله المكالمه والدليل انها ماتبي تنهيها...
سعود من غير شعور: عبير بقولك كلام يمكن اول مره تسمعينه مني..
عبير خايفه: وووش؟؟..
سعود: عبير أنا اعشقك مو احبك بس
عبير تجمدت كل اطرافها وماعرفت وش ترد عليه وتقوله...
سعود مالقى أي رده فعل بعد هالكلام توقع انه ماتكلم بالوقت المناسب...
سعود بخيبه امل: أنا اسف
عبير خانقتها العبره: لاااا ياسعود لاتقول كذا...(وقطع صوتها الصياح وماقدرت تكمل كلامها )
سعود: وش فيك تصيحين يابعد الدنيا دموعك غاليه علي
وبدا بينهم مسلسل من الدموع والعتب اللي استمر إلى اذان الفجر...

قبل اسبوع ام نواف كلمت اهل خلود واليوم ردوا عليهم... ريما طارت من الفرحه ونواف ابتسم وقال الله يكتب اللي فيه خير..
ام نواف: اللحين لازم نروح للناس مايصلح خطبه بس بالتلفون..
ابونواف: اكييد لازم نروح لهم
ريما متشققه من الوناسه: ايه بعد عشان نواف يشوف خلود
نواف: لهالدرجه فرحانه..
ريما: أنت اخوي وهي صديقتي اكيييد بصير فرحانه... سعادتكم غايتنا
نواف: ههههههه احس انها دعايه بنك
ابونواف: نشوف عالاسبوع الجاي نحاول نروح
نواف: بس أنا مااقدر اترك الرياض هالفتره...
ريما: أنا عندي حل مدامهم موافقين خلاص خلوو الموضوع خطوبه وملكه...
نواف: مره واثقه انها بتعجبني
عبير توها داخله عليهم: والله البنت حلوووه احسها بتعجبك
ابونواف: صح النوم توك تصحين؟..
عبير: والله مانمت إلا الفجر
ريما: عاد عيالك نايمين بدري وش عندك قاعده للفجر
عبير تصرف ريما: جلست اتصفح مجله ماجاني النوم
ام نواف: كنها عجبتني فكره ريما نروح عندهم اسبوع منها خطبه ومنها ملكه
ريما: بس لاتوهقون البنت من اللحين تكلموااا عشان تتجهز
عبير: وش رايك بعد ياريما تتزوجون بيوم واحد
ريما: الله وناسه
ابونواف: لو داري ان ريما بتفرح بصديقتها لهالدرجه كان أنا خطبتها من زمان
الكل: ههههههههههههههههههه
ريما: هيييييي هييييييي أنت دافع عن امي وعن مرتك





ساره جالسه بالصاله مع وتحس انها مو على بعضها ودها تسأل امها عن الناس بس منحرجه ماتدري وش تقول واخيرا قررت تتكلم...
ساره بتردد: يماااا
ام مشاري: نعم
ساره: وش صار عالناس اللي جووو قبل فتره يشوفوني؟؟..
ام مشاري وماودها تضيق صدر بنتها: والله مدري لهم حول ثلاث اسابيع ولا ردووا علينا يمكن يدقون نكون طالعين ولا يحصلون التلفون مشغول
ساره: من كثر طلعاتنا حنا والتلفون نادرا ماينشغل
ام مشاري: يمكن خيره يابنيتي
ساره: أنا ماهموني من البدايه اصلا.. بس المفروض يردون حتى لو ماعجبتهم
ام مشاري: والله مدري عنهم
ساره: يمااا الناس دايم عادتهم اذا ماعجبتهم البنت يطنشون ولايقولون شئ
ام مشاري: والله على حسب ناس عندهم ذوق يقولون قسمه ونصيب وناس ماعاد تشوفينهم
سكتت ساره وهي نقول بنفسها مسكينه أنا مقروده دايم الدنيا ضدي..
.
.
طلعت غرفتها تصيح تحس ان الدنيا دايم محاربتها ماعندها احد لاصديقات ولاخوات ولااحد تشكي له كلن لاهي بدنياه كلهم تزوجووا وتركوني محد فيهم يفضي من وقته دقايق يسمعني مليييت يارب حتى يوم قلت جاني الفرج وانخطبت ماحصل نصيب..
دخلت عليها امها وشافت بنتها على ذا الحاله.. ضاق صدرها عليها ساره لها فتره على ذا الحال وتحديدا بعد ماتزوجت اختها وملكت ريما.. امها من زمان حاسه فيها بس ماكانت تتكلم لكن اليوم الموضوع كبر ساره اللي كان ضحكها يوصل اخر الشارع اللحين تصيح..
ام مشاري: وش فيك؟؟.. ترى الدنيا ماتسوى ياساره
ساره تمسح دموعها: بس الدنيا هاذي حنا عايشين فيها يماااه
ام مشاري: يابنتي كل واحد بهالدنيا ياخذ نصيه.. محد يقول لو اني سويت.. او لو كان كذا ماصار كذا.. كل شئ مكتوب عند الله..
ساره: ملل يمه كل شئ يمشي عكس اللي ابيه
ام مشاري: والله ياساره اعرف وحده حرمه عندها بنات ماتطلع من البيت الامسحبه بناتها معها وزواجات تشخص فيهم وتدور فيهم تبي الكل يعرفهم ومع كذا بناتها الثنتين إلا اليوم ماتزوجوا.. ووحده ثانيه وربي ان بنتها ماتحب الطلعات تحلف امها ان حتى السوق خواتها يشرون لها ملابسها ابد من البيت للجامعه ومن الجامعه للبيت خطبها واحد ماشاء الله مال ومركز ونسب.. ترى اللي ربي كاتبه بيصير فوالواحد ليش يعترض..
ساره وكنها بدت تقتنع: منهم هذولا يما؟؟..
ام مشاري: ناس الله يستر علينا وعليهم.. وهذا نصيب ياساره ربي وربك مقدره علينا كلنا..
اذا هو قاسمه من حنا عشان نعترض..
بعد كلام امها هدت شوي وطلعت تغسل وجهها وتمارس حياتها الطبيعيه لان اقدارنا مكتوبه عند رب العالمين اللهم لااعتراض





سافروا كلهم للخطبه الرسميه والملكه زي مااتفقوا مع اهل خلود كل شئ مشى بشكل طبيعي
استقبلهم خالها فهد وجلس معهم..
بالبدايه نواف شاف خلود وعجبته بعد يومين صارت الملكه وكانت خلود بسيطه جدا خاصه ان الفتره بسيطه وماكان في وقت تستعد...
عبير تحسفت انها راحت معهم عيالها طفشوها وتتخللت جلستهم هناك مكالمات بينها وبين سعود بس ماكانت تأخذ راحتها لانهم كانوا ماخذين جناح وريما معها بنفس الغرفه..
اما ريما اكثر وحده كانت مبسوطه واخر يوم قبل سفرهم نامت عند خلود بما انها صارت وحده من العايله...
نواف ماتوقع خلود بهالشكل لان طبيعتها مره هاديه عكس ريما فهو كان حاط بباله انها نسخه من ريما وهبالها لكن طلعت غير اللي راسمها في باله..
ماحبيت ادخل لكم بالتفاصيل لان ماكان في شئ يستحق الذكر كل شئ تم بهدوء والحمدلله..





في السياره يدورون كالعاده من غير أي هدف...
منصور: يااخي وش فيك وقفت؟؟..
مشاري: وين تبينا نروح؟؟..
منصور: عند العيال في غيرهم
مشاري: مالي خلق... طفشان
منصور: أنت قلي بس متى عمرك استانست
مشاري: والله ملل مليت أنا من كل شئ
منصور: اضحك للدنيا تضحك لك
مشاري: ياشيخ ضحكنا لها كشرت بوجيهنا
منصور: وش فيك بالضبط مو معقول طفشان كذا من الباب للطاقه في شئ مضيق صدرك؟؟..
مشاري: يااخي البيت ملل... جمعه الشباب ملل..حتى الشوارع ملت مني
منصور: لاااااا أنت حالتك ميؤس منها.. خويتي عندها اخت رهيبه تبي اعرفك عليها
مشاري: وأنت احد لاعب عليك قايل لك الوناسه بالبنات
منصور: ااااااه في احلى من النعومه والدلع بهالدنيا
مشاري: الله يعافيك وش نعومه ودلع والله لو أنت مخاويلك حليمه بولند ولاسيمون
منصور: هههههههههههههههههههههههههههههههههههههههههههه
مشاري: والله قلبي قايل من شاف وجهك يشوف دلع
منصور: طع شوري وخلني اشبكك مع البنت
مشاري: مشكوووور عندي ثنتين مصدعين راسي تبيهم خذهم...
منصور: بس هاذي غييير
مشاري: ياشيخ كلهم مثل بعض.. بس اللي أنا مستغربه من بعض البنات انك مهما تطنشهم مايتركونك.. اجحدها طنشها سبها ولاكنك سويت شئ تدق ولا كأن شئ صاير...
منصور: ماينلامون مشاري مطيح البنات..ههههههههههههههههههه
مشاري: هاهاهااهاهاهاي تبي تقنعني انك أنت وسيم اكثر مني
منصور: هههههههههههههههههه
مشاري: اللي على راسه بطحاء يحسس عليها





جالس في المكتب سرحان ونظره الحزن باينه بعيونه دخلت عليه مها وحست انه مو طبيعي ومتضايق من شئ..
مها: خالد..
خالد رفع راسه لها بدون ماينطق بحرف
مها: خالد وش فيك..؟؟
خالد: ولاشئ..
مها: شكلك موطبيعي صاير شئ؟؟..
خالد وهو قايم: لاسلامتك لاتشغلين بالك مافيني شئ
مها: اكيييييد
خالد بابتسامه باهته: اكيد...
وبعد ماطلع خالد من البيت جلست مها على مكتبه ولفت انتباهها ورقه قعدت تقراها دمعت عينها لان الكلمات اللي قرتها تلين الصخر..
وعشان مااثير فضولكم اكثر بنقل لكم اللي مكتوب عالورقه...


يبـه وانا بعــد 12 عـــــام حسيت***اني قدرت اقول شي كتمته
ابطـى قصيدي ما انكتب فيك وابطيت***اجر صوتي وارجع اجر صمته
ما ودي اكتب بيــــت واندم على بيت***مهوب شعر الشعر كاني زهمته
الشعـــر كانه ما انحنــــى لي ما جيت***ان ما عزم مرثيتك ما عزمته
ان ما كتبتـــه بازرق الدمــــع وابكيت***كل الجروح المبطية ما رحمته
يبه وانا من بعدك ابو التناهيت***ما مر طعم للحزن ما نهمته
يبه وانا لا ضقت رحت وتهجيت*** ركون بيت ضم حلمنا وحلمته
يومك تعلمني لا من تحاكيت***درس الحياة اللي كبرت وفهمته
هناك كانت دلتك لا تقهويت***وهناك كان يساق طيب حشمته
وهناك ايه اذكرني هناك خليت***طفل ملى بالدمع درب رسمته
هناك جاني علمك انك توفيت***وهناك خاويت الشقا واحتزمته
واليوم قلت اليوم يومي ومديت***كف القصيد وطاح شعري ونظمته
ولكن بعد صمت 12 عام حسيت ***اني عجزت اقول شي كتبته

القصيده للشاعر.." فهد المساعد"




بعد مارجعوا بكم يوم مجتمعين بالصاله على قهوه المغرب...
ابونواف: اللحين انتم كلمتوا ام البنت ان الزواج يكون بالرياض احسن
ريما: اصلا خلود تبي الرياض
ام نواف: اييييييه امها تقول انتم فصلوا وحنا نلبس
عبير: غريبه صراحه اهلها وافقوا ان الزواج مايكون عندهم بالعاده يصير الزواج بنفس الديره اللي فيها اهل البنت
نواف: بس هم ناس طيبين ماعندهم هالشكليات
ريما: بعدين هم اساسا كانوا ساكنين بالرياض ورايحين هناك فتره مؤقته عشان كذا كان الموضوع عادي عندهم
ام نواف: اللحين الله يعين عالتعب كل واحد له عرس وحوسه
عبير: لا أنا عندي فكره مدام ان اهل خلود موافقين زواجها يكون بالرياض ليه يانواف ماتخلي زواجك أنت وريما بليله وحده
ريما: والله فكره
نواف: هي قالت وش رايك يانواف ماقالت ريما

ريما: اصلا الشرهه على اللي اخليكم تشاركوني لحظاتي الحلوه
ابونواف: عبير وين عيالك ماشفتهم اليوم
عبير: روشتهم ونومتهم بعد شوي بيجون عماتهم هناء ولينا يشوفونهم
ام نواف: ياحليلهم والله انهم واصلين
ريما: نرجع لموضوعنا... من الصبح وانا اتكلم عن القاعه ومحد عاطيني وجه
عبير: وين ودك تحطينه ياحلووه
ريما: مدري ودي قاعه الرياض ولا السليمانيه
ام نواف: اللــــــــه الدرج طويل بتطيحين وانتي تمشين
ريما: هههههههه كانوا طاحوا كل العرايس
نواف: تدرون كنها عجبتني الفكره أنا وريما بليله وحده
ريما: لااااااااا ياشيخ
عبير: أنا اقوول قاعه الرياض احلى مره طلعت حلوه بعد ماجددوها
ابونواف: صادق أنت يانواف ودك أنت واختك بليله وحده
ام نواف: ايه والله اريح
نواف: خلاص مدام الوالده قالت اريح نبي نريحها
دق جوال عبير ابتسمت كانت حاطتله نغمه خاصه يمكن تكون الاغنيه قديمه شوي لكن الكلمات كانت عالجرح بالنسبه لعبير" لمني بشوق واحضني بعادك عني بعثرني" لعبدالله الرويشد
عبير وهي قايمه: الووووو
سعود: هلا وغلا.. عندك ازعاج طالعه؟؟
عبير وهي تطلع الدرج: لا كنت جالسه مع اهلي قاعدين يخططون لزواج ريما ونواف قرروا يخلونه بليله وحده..
سعود: ماشاءالله.. طيب وش رايك ياعبير بدال ماتكون ذيك الليله اربع قلوب فرحانه خل نخليها سته...
ابتسمت عبير وكملت مكالمتها معه وقلبها طاير من الفرحه لاستعاده هالحب الكبير....






بعد كم يوم ريما ماسكه الريموت وتفلب القنوات دق تلفون البيت وردت عليه..
ريما: الووووو
راكان: هلا
ريما ومومستوعبه الصوت: الوووو
راكان: لاتردين عالبيت مره ثانيه
ريما: ليش؟؟..
راكان: صوتك يذوب ماابي احد غيري يسمعه
ريما: عاد الناس يقولون صوتك بزر
راكان: ماعندهم سالفه
ريما: غريبه وش عندك داق عالبيت؟؟.. مضيع رقمي
راكان وبيرفع ضغطها: ومن قال اني داق ابيك؟؟..
ريما: اوووووووف ياراكان عورني وجهي
راكان: ههههههههههههههههه احبك ياريما وربي احبك
ريما: ايه واضح
راكان: والله محد يسواك عندي.. تعالي ماتلاحظين أنا دايم اقولك كلام حلوو وانتي بخيله على
ريما: ايييييه تقول كلمتين حلووين من هنا وتطيح وجهي من هنا
راكان: هههههههههههههه خالي موجود؟؟..
ريما: وش تبي فيه؟؟
راكان: رحت اليوم ادفع العربون حق القاعه وبتاكد منه من عدد الاشخاص
ريما: اهااااااااااا .. لحظه اناديه لك
راكان: ريما
ريما: هلا
راكان: اليوم باليل لاتنامين بدق عليك
ريما بحيا: لحظه انادي ابوي
.
.
.


ومرت بعدها ليالي وايام كثيرة ناس فرحانين وناس مبسوطين وغيرهم مترقبين
والكل على اوج الاستعداد لليله العمر


وجت ليلة الفرح الكبير..

اليوم زواج ريما وراكان & وخلود ونواف.. كان كل شي يمشي بهدوء وبساطة على غيـر المعتاد القاعه كانت كبيره وواسعه والمعازيم كثار لان الزواج لاثنين مو لواحد..
انشغلت ام نواف وام راكان وحتى ام خلود باستقبال الحضور وماراح انسى ام مشاري اللي ماقصرت معهم..
الجميع مبسوطين ومرتبشين ويرقصون بفرح البنات بصراخ وهبال خلوو للزواج طعم
ساره لابسه فستان احمر طالع عليها جنان كانت كل شوي تقوم وتطلب من الطقاقات اغنيه..
صديقات البنات كلهم حظروا مانسووو بنات المدرسه والبنات اللي بالجامعه مع ريما
ريهام جت وجلست مع مها على نفس الطاوله
مها بما انها مامر على زواجها إلا اشهر فهي تعتبر إلا الان عروس كانت لابسه فستان فخم وراقي لونه فوشي ومتداخل معه لون التوفي والبيج والذهبي الصدر عباره عن اشكال نحاسيه متناسقه مع الفستان من جد كانت نجمه الحفل هذيك الليله..

اما عبير ماجلست طول الزواج وهي واقفه رايحه وجايه من يلومها والليله زواج اختها الغاليه واخوها العزيز حتى صديقتها نجلاء ماقدرت تجلس معها الادقايق معدوده.. يمكن تستغربون عبير إلا الان مارجعت لسعود مثل ماطلب منها هو كلم اهلها ووافقوا بس هي ماحبت البيت يفضى على امها فجأه بعد اخوانها فقالت له ننتظر فتره بعدين نتزوج...
كانت لابسه فستان ملون متداخل ومتشابك الالوان بين اللون الوردي والليموني والاخضر والبيج والسماوي كان الفستان يعكس حياتها الحاليه من بعد عيالها وصفاء قلبها تجاه سعود يعني تحس ان حياتها صارت ملونه ولها طعم مو مثل قبل فكان اختيارها لهالالوان مو من محض الصدفه لا كانت متقصده هالشئ..

وعالساعه وحده بالضبط طفو الانوار وجاء وقت الزفه بالبدايه دخلت خلود بناء على رغبه ريما ان صديقتها ومره اخوها تكون الاول بالزفه..
خلود كانت تمشي على نغمات الموسيقى الكلاسيكيه

فستانها كان لونه سكري والشك اللي عليـه بمنتهى الروعة.. فتحته واسعة وهذا اللي خلى شبكتها تبان بوضوح للكل كانت لابسه عقد ذهبي تبرز منه الماسات صغيره بنفس اللون وبلمعه رهيبه. طرحتها دانتيل فرنسي لونها ذهبي وسكري كبيـرة وطويـلة وتسريحتها بسيطة بمنتهى الجمال وماكياجها كان متدرج من البني الغامق إلى الذهبي إلى البيج اللي بين حلاه عيونها ولون بشرتها..
ومعها بيدها مسكه لونها احمر قاني..
بعد ماوصلتت للكوشه جلست وغنوو لها اغنيه وصورتها المصوره كذا صوره وبعدها بنص ساعه طفوو الانوار مره ثانيه ونزلت ريما
على نغمات اغنيه راشد الماجد..

حد منكم شاف فالدنيا بدر** مقبلن يمشي ومن حوله بشر..

كانت تنزل من الدرج اللي كان طويل الكشاف مسلط عليها اخذت نفس عميق والكل لاحظ توترها وكان صدرها يطلع وينزل من شده الارتباك عيونها تطالع عالكوشه ابتسمت ابتسامه خفيفه يوم شافت خلود جالسه وتشجعت اكثر انها تكمل بعد مانزلت الدرج ارتفع الممر اللي تمشي عليه عشان الناس يشوفونها حست انها فقدت توازنها لكن تماسكت وكملت واخيرا وصلت عند الكوشه اللي كانت عباره عن شلالات والورود والزرع متناثره بكل مكان والارض مفروشه بالعشب الاخضر لدرجه انها توحي بالناظر اليها انه بغابه او حديقه غناء وكانت هاذي من اختيارها
طلعت الكوشه وكان لها ستايل مختلف عن خلود فستانها لونه ابيض له سيورخفيفه وكان الفستان ناعم جدا ساده مافيه أي حركه إلا الذيل الطويل اللي كانت عليه ورود باللون الفوشي منظومه بعنايه ولاضافه اكشن عالفستان الخالي من أي تداخلات لبست طقم الماس ابيض ويتدلى منه ماسات فوشيه وحتى تسريحاتها كانت كول مرفوع شعرها بنعومه ومثبته الطرحه وعليها ورده فوشيه كبيره شكلها ناعم وانيق..
اما مكياجها كان غامق ومرسوم بعنايه متدرج من اللون الاسود والوردي والفوشي والفضي..
ومعها مسكه بيدها لونها فوشي بعد
(شكلكم تقولون مو باقي الاتصبغ شعرها فوشي هههههههه)
بس مااخبي عليكم ريما بطلتها هاذي غطت على خلود بكثير لان شكلها كان خيالي وجميع الحاضرين مدحوا في ذوقها واناقتها البسيطه
جلست جنب خلود وهي تبتسم وصورتهم المصوره صور جماعيه وطلعوا اهلهم يسلمون عليهم وساره ضمت ريما وجلست تصيح وتدعي لها بالتوفيق
وعبير ماقدرت تمسك دمعه فرح سالت منها بشوفه اخوانها الليله معاريس
وام نواف ماكانت اقل منهم فرحه خنقتها العبره ونزلت من الكوشه اخيرا تحقق حلمها بزواج ولدها من زمان وهي تتمنى هاليوم وربي حقق لها مناه وكانت هالليله فرحتها مضاعفه بريما سبحان الله قبل كم سنه كانت طفله صغيره نخاف عليها واليوم هي عروس الله يتمم لكم ياعيالي ويوفقم ويسعدكم يارب..
وام خلود كانت جالسه جنب بنتها بالكوشه من يوم مانزلت تسمي وتقرا عليها وتدعي لها بالحياه السعيده..

وبعد ساعه صار الوقت يدخلون العرسان وكانوا مخططين لهاللحظه من زمان ريما مايفوتها شئ كانت مثقله طرحتها عشان تتغطى فيها.. في البدايه دخل نواف وابوه ...فهد خال خلود كان بيدخل بس ماحب يحرج ريما وتتغطى وتنحاس اكتفى بالسلام عليها قبل الزفه نواف وقف جنب عروسته سلم عليها وصور معها وهو يطالع ريما قرب منها وبارك لها وردت عليه بهمس شك انها اخته ريما لانها معروف عنها النعومه بجهه وهي بجهه.. ماطول نواف عشانها كلها عشر دقايق واخذ زوجته وطلعوا بيروحون للبوفيه عشان يقطعون كيكه الزواج او كعكه الزواج..
نواف مسك يد خلود وقبل ماينزل التفت على ريما: لاتتاخرون ترى بنخلص عنكم الكيكه
ابتسمت ريما بخجل وماردت عليه..
اما ابوها جلس عشان يزفها لعريسها بهالليله اللي ينتظرها كل اب ويفرح فيها..
وبعد ماطلعوا دقايق ووصل راكان مع ابوه وطلعوا للكوشه ابتسم لريما وسلم عليها وبارك لها.. وهي كانت مستحيه ماتدري ليش مع ان لهم فتره

مملكين بس اللحين هي عروس وقدام الناس والكل يتابع تحركاتها..

انتهت الليله على خير والقلوب فرحانه المعاريس راحوو للفندق اللي كانوا حاجزين فيه هالليله بس لانهم من بكره بيغادرون لقضاء شهر العسل
ريما وراكان بيقضون شهر العسل في النمساء ذات الطبيعه الخلابه..
نواف وخلود بيروحون جزر الكاريبي...





هنا ينتهى الجزء ولكن تابعوا بقـــــــي..

^
^
^





%%% لقطات من شريط السنين %%%


%% بعد مرور سنه%%


دخل خالد غرفه النوم لقى مها مطفيه الانوار وحاطه شموع ومغيره مفرش السرير صايره الغرفه جوو رومانسي .. تذكر خالد ان اليوم هي واعدته بمفاجئه والمفروض بالمقابل يكون متجهز بهديه بسيطه بس نسى وانحرج بس حاول يغطي على نفسه بالكلام الحلوو لانه اللحين بعد مرور اكثر من سنه حس انه هالانسانه تدور راحته وتسوي كل شئ يرضيه.. يعني خالد تقريبا صار يميلها ويتقبلها اكثر من اول لانها عرفت كييف تكسبه بالكلام الحلوو والمعامله اللينه و..
مها كانت مصلحه مفاجئه لخالد مغيره ستايل البيت كله مو الاثاث لا بس اماكن الاشياء وخاصه غرفه النوم واضافت عليها اشياء خلاها بمنتهى الروعه...
خالد: وش القصه الكهرب طافي..؟؟!!
مها: لا شكل قلبك طافي
خالد: اوووف قوييييه.. بس تدرين انتي نورتي قلبي من دخلتيه
مها وهي تمد له هديه مغلفه: عمري جبت هالهديه قلت مو بس أنت اللي تجيب لي دايم..
خالد بابتسامه: يوو واحد تورط مايدري وش يرد
اخذ خالد منها الهديه وجاء بيفتحها بس قال لازم اعتذر لها اني ماجبت لها شئ اخاف ينكسر خاطرها..
خالد: مها لاتقوليين خالد نساني ماجاب لي شئ .. لي كم يووم ادور لك على شئ حلوو ومناسب امس وديتها تتغلف اليوم رحت المحل لقيته مقفل..
مها: أنا يكفيني تكتب لي قصيده فيها اسمي
خالد: وووين اسمك؟؟ اسمك احتفظ فيه لنفسي..
فتح خالد هديه مها لقاهااااا
.
.
.
مرايه اطرافها اكسسوارات ناعمه حجمها متوسط مكتووب عليها

" أنت تنظر الان إلى اعظم رجل في العالم"





وبمكان ثاني واشخاص غير..
راكان وهو منحرج: ريما باعترف لك اعتراف..
ريما: وشوووو؟؟؟؟
راكان: أنا انسان صريح ومااحب اللف والدوران.. صحيح ان اللي بتكلم فيه اللحين ماضي بس أنا يهمني زوجتي تعرف كل شئ عني..
ريما: راكان وش السالفه خوفتني..
راكان: قبل سنتين تقريبا كانت احب وحده وكنت على وشك اني اتزوجها بس..
ريما تطالع فيه وهي مصدومه..
راكان: وش فيك؟؟!.. من اولها كذا نظرات خلاص شكلك بتزعلين أنا غبي هذا ماضي المفروض مااتكلم فيه بس حبيتك تشاركيني ..
ريما: طيب كمل..
راكان: وعد انك ماتزعلين.. عاد انتي حامل والزعل مو حلوو عشانك
هزت راسها بالايجاب..
راكان: شفتها بمصر واخذت قلبي وعقلي كله معها..
ابتسمت ريما وطالعت فيه بخجل..
راكان وبيرفع ضغطها: وش فيك استحيتي ؟؟.. لايكون على بالك انتي..
ريما تطالعه بمكر: دينا
راكان: من دينا؟؟...
ريما: عاد أنت كل صيفيه تحب لك وحده..
راكان: ههههههههههههههه لا مو دينا ماراح اقولك مين..
عصبت عليه ريما وقامت بتقرب منه بتنتقم بس هو سبقها وطلع..
راكان وهو واقف عند الباب: سويي لي صينه خضار اليوم..
ريما: لك وجه تطلب بعد.. بسوى لك برجر ولا هوت دق
راكان: ارحميني بطني راح فيها من منتجات امريكانا.. الشركه بيرسلون لنا خطاب شكر الزبون الدائم لهم...
.
.
رفعت ريما سماعه التلفون..
ريما: الوووووو
ام نواف: هلاااا والله
ريما: هلااا يماا انقذيني..
ام نواف: وش عندك هالمرره شاهي ولا قهووه؟؟
ريما: هئ هئ لااااااا يما هالمره راكان مشتهي صينيه خضار
ام نواف: ههههه ياشيخه بتكملين سنه متزوجه بعد ثلاثه شهور ان شاء الله بتصيرين ام والا الان انتي حوسه بالمطبخ..
ريما: يماااا استحمليني إلا مااتعلم.. وش اسوي له راكان يتشهوي على حسابي وانا الضحيه..
ام نواف: قطعي كل شئ حلقات البطاطس والكوسه والجزر و..





نواف يفطر وهو مستعجل وكوب الشاهي ماكمله..
خلود: وش فيك الدنيا ماراح تطير..
نواف: احب اروح المحل بدري.. ماابي العمال يكونون الحالهم مااعتمد عليهم لازم يصير وراهم احد..
خلود: هذا وأنت محل واحد الله يعين اذا فتحت الفرع الجديد..
نواف: اووو صح ذكريني الله يذكرك بالشهاده بمر الرجال اليوم بشوف وس سوى مع مكتب العقار..
خلود: الله يعينك.. طيب وش صار على الطلعه؟؟
نواف: لاااااا هالاسبوع مااقدر شوفي اهلي اذا بيروحون روحي معهم..
خلود نزلت راسها وشكلها تضايقت..
نواف: حبيبتي استحملي عشاني أنا كل هذا عشان مين اسوويه..؟؟
خلود: بس أنت كل وقتك لشغلك وانا مااشوفك إلا عالوجبات او عند النوم..
نواف وهو طالع: انتي ماتسمعين بمقوله .. وراء كل رجل عظيم امراه
خلود بابتسامه: انتبه لنفسك ولاتسرع..





في مدينه الالعاب انواع الازعاج والصراخ..
عبير: سعود امسك فهودي لايطيح
سعود: لاااا أنا حبيبتي شهد ماامسك إلا هي
عبير: بدت اللعبه لايطيحون انتبه لهم بصلح طرحتي
سعود يقرب من شهد ويبوسها: هوبااااااا طرنا بالسماء
فهد قرب من عبير وضمها شكله خايف..
فهد: هيييييي ماما
سعود: وش فيك خايف يالدب البنت احسن منك
عبير: حرام عليك تعقد الولد
سعود: شهودي قولي بابا
عبير: وماما بعد
ابتسمت شهد ابتسامه مشرقه كلها براءه طفوله..
سعود: البنت هاذي غريبه ماتتكلم ابدا وفهد ماشاء الله عليه لسانه منطلق
عبير: بسم الله على عيالي توهم صغار ماكملوو سنتين
سعود حزت بخاطره كلمه عيالي مع انه يعاملهم مثل لو كانوا عياله لكن الحقيقة هي انهم مو من صلبه.. هو إلا اللحين مافقد الأمل مازال يراجع المستشفيات ومايفوت مواعيده وايمانه بالله قوي وكل يووم يدعي ربه انه يرزقه ولد منها..
عبير: وين سرحت؟؟
سعود: هاااااا... معك.. يلااااا بسرعه خلينا نرجع البيت ابوي مره تعبان ماابي اتركه اللحاله
عبير: يلاااااااا مشيناااا

جالسه بالصاله تتامل البيت اللي فضى عليها فجاه صار خالي ماله طعم ولا أي حس دخل عليها ابو نواف: السلام عليكم
ام نواف: هلا وغلا وعليكم السلام
ابو نواف: وش فيك سرحانه؟؟
ام نواف: اااااه جالسه افكر بعيالي كل واحد منهم راح بطريقه وشاف حياته والبيت فضى علينا
ابونواف: هاذي سنه الحياه
ام نواف: تصدق تووي احس بطعم يوم الخميس لما يجتمعون عيالي عندي
ابو نواف: ادعي لهم الله يوفقهم
ام نواف: الله يستر عليهم ويوفقهم ويقوم لنا ريما بالسلامه..
ابو نواف: امين
ام نواف: فارس الله يهديه طلع من العصر والا الان مارجع
ابونواف: دقي عليه





وفي بيت ابو مشاري وبالتحديد في الصاله جالسين..
مشاري: مها من زمان مامرتنا
ساره: أنا على بالي بتصير كل يوم تجي بس هي هي على حالها
ابو مشاري: حتى خالد مدري عنه إلا من مها
ام مشاري: قبل كم يوم جت بس ماطولت.. خلاص البنت لاهيه ببيتها وزوجها على بالك كل الناس مثلك فاضين..
ابو مشاري: يصير فاضي ولا يفشلنا عند الناس
ساره: هههههه مشاري أنا اللي راح اخطب له.. اذا حقدت على وحده بالجامعه على طول بخطبها لك عشان تنتقم لي منها اشد انتقام..
مشاري يطالع ساره بنظرات..
ام مشاري: قل خيرا اواصمت
ساره: اصمت اجل احسن اطلع اكلم بالتلفون ولا اطالع الفديوو
ابو مشاري: وبس انتي طول يومك ياعند التلفزيون ولا معلقه سمعه التلفون
ام مشاري: ريما اللي كانت مونستها خلاص تزوجت ومها لاهيه بعد
ساره: ياحبيلها امي محد حاس فيني إلا هي
مشاري: يلاااااا أنا بطلع تبون شئ


%% بعد مرور خمس سنوات%%


خالد: مها.. مهـــــــــــــــا
مها وتطل من كونتر المطبخ: هلاااا وش فيك؟؟
خالد: تعالي خذي جود حاستني
مها: ياويلك من ربي انتم كذا الرجال تبون عيال تبون عيال واذا جوو ترمونهم على الام وماتعرفونهم إلا اذا كانوا رايقين ومرتبين..
خالد: لا ياقلبي أنا احبهااا وامووت فيها بس اللحين مشغول وجالس اكتب قصيده وهي حاستني وانا ابيك تشيلينها عشان ماتطير الفكره..
مها: لمين القصيده؟؟
خالد: بعدين اذا كتبتها تعرفين.. جودي يلااا روحي مع ماما
جود: لااااا مبي
مها: هههههه قوويه بنتي.. تقول ماابي
خالد: يلااااااا بس قومي مافي ماابي
جود تطالع ابوها بنص عين: دب
خالد: ههههههههه قلبوس الدبه انتي
شالتها مها وهي تصيح..
خالد: شوي شوي عالبنت..
مها: ياسلاااااام أنا اللي هي أنا.. ماتخاف على كذا
خالد وهو ياشر على عيونه: انتي عيني ذي وجود عيني الثانيه..
ابتسمت مها وراحت تكمل شغلها بالمطبخ وجود معها..
.
.
.
بعد نص ساعه ناداها خالد وجلس يقرا لها قصيدته الجديدة..

هلا بعمري هلا بروحي هلا باللي تذوبني
هلا بمن عطرها يملى على دنياي وايامي
هلا باللي اذا نادت اجيها بلهفه وكني
.وصلت لاخر الدنيا طويت الارض باقدامي
اجي باحساس وانسى الناس اجي مرتاح متهني
ابي ترويني بايديها لاني بدونها ضامي
اجي عطشان اجي ولهان كاني كنت مستني تناديني
واجيها بشوق كنت احسه داخل عظامي
هي اطيب قلب واجهته وماقد خيبت ظني
هي اجمل وجه قابلته وهي اكبر من احلامي
تقول اني احب انسان وتقول باني واني
وانا ليمن بدت تمدح ادور اقرب اقلامي
لاني لو عجزت اكتب غلاها وقربها مني
اجل وش فايده شعري اذا مايكتب الهامي
صدوقه وان نوت تكذب تقول ارجوك سامحني
تحس ان الكذب حاجه عظيمه شئ اجرامي
بريئه في سوالفها تسولف عنها وعني
تذكرني بكل موقف جمعنا وصار قدامي
حنونه صوتها دافي ولها نبره تدوخني
بنبرتها يجي اسمي ماكنه خالد ...


القصيده للشاعر.. " فيصل اليامي"

دخلوو شهد وفهد المدرسه والاسبوع هذا اول اسبوع دراسي لهم..
مر سعود عليهم واخذهم من مدارسهم ورجعوا البيت.. اول مادخلو البيت ضمتهم عبير وباستهم..
عبير: وش سويتوو حبايبيي اليوم
سعود: امااااا فهد فضيع إلا نهايه الدوام يصيح
فهد: ماصحت بس شوي
سعود وهو يضمه ويغمز لعبير: لا ماصاح هو رجال كبير
عبير: وانتي يالدبه وش سويتي اليوم؟؟
شهد: عطونا حلاوه وشيبس وعصير
سعود: وينهم؟؟
شهد: اكلتهم
عبير: يالدبه ليه ماجبتي لفهودي
فهد: أنا بروح مدرسه شهد بكره
قعدووو سعود وعبير يضحكون على كلام وبراءه الاطفال.. عبير: يلاااا نروح نغير ملابسنا عشان نتغدا . . . على طاوله الطعام عبير هي متردده: سعود حبيبي بقولك شئ أنا نفسي متفاجئه فيه وما قلتلك إلا بعد ماتاكدت سعود: خير ان شاء الله عبير: أنا من كم يوم احس بتعب اليوم الصباح رحت الطبيبه
سعود: وش فيك؟؟
عبير: طلعت حامل
سعود يطالعها وهو متفاجئ ومو مصدق ويحس انها تلعب عليه..
فهد: ماما حامل
سعود: واللـــــــــــــــه ياعبير
عبير: والله
سعود: مو مصدق اكيد ياعبير اكيد هالكلام
عبير: ربك قادر على كل شئ
سعود نزل راسه..
عبير: وش فيك؟؟
سعود: اااااااه ياعبير تمنيت ابوي عايش كان فرح بهاللحظه
عبير: الله يرحمه ويغفرله
شهد: بابا ماما عندها بيبي ببطنها..
سعود و عبير: ههههههههههه





قفل التلفون وهو مبسوط..
خلود: ان شاء الله دوم هالوناسه
نواف: اميييييين
خلود: وش فيك؟؟
نواف: هالاسبوع افتتاح شركتنا
خلود وبابتسامه: مبروك الف الف مبروك
نواف:هذا كله بفضل وقفتك معي وتفهمك لوضعي
خلود: تصدق أنا وأنت بالجنه.. أنا رزقت مثلك فصبرت وأنت رزقت مثلي فشكرت..
نواف: وش قصدك انتي الزينه وانا الشين.. اساسا أنا كل بنات حارتنا كانو يتمنون مني نظره..
خلود: ياقدمك أنت وحارتنا وين عايش ..
نواف: اقوول بس لايكثر وين عزوز؟؟
خلود: عند امي من امس قالت خليه ينام عندي.. شفت انك ماتدري عننا
نواف وهو منحرج: خلود والله أنا احبكم وكل شئ اسويه عشانكم وولدي ماانتبهت له لاني امس جيت دايخ حطيت راس ونمت.. هذا مو عدم اهتمام مني..
خلود: امزح معك وش فيك فتحت لي محاضره..
نواف: لا عمري من جد انتي متضايقه مني تكفين تكلمي لاتخلين بقلبك شئ..
خلود: بقولك شئ بس اخاف تصفقني..
نواف: وشوووو لا تخافين متعود على مقالبك انتي وريما.
خلود: عزوز نايم بغرفتنا مو عند امي
مسك المخده اللي عالكنبه ورماها فيها وهي تصارخ..




في مستشفى الولاده فتحت عيونها تطالع السقف وتحس كل تعب الدنيا فيها نزلت راسها تطالع بطنها اللي اختفى فجأه..
راكان: الحمدلله عالسلامه ياام رنا جتك بنت ثانيه..
ريما بابتسامه باهته: اااه الله يسلمك
راكان: يلااااا فمان الله..
ريما: وين ؟؟؟
راكان: افااااااااا نسينا الوعد
ريما ومو فاهمه شئ: أي وعد؟؟
راكان: توو شفت وحده رهيبه بلحق عليها قبل ماتطلع بشوف مرتبطه ولا لا؟؟
ريما وتذكرت: اقوول بس ترى الاولى أنت سميتها هاذي أنا بسميها رغد
راكان: وشوووو ماصارت كل الدنيا بحرف الراء راكان, ريما, رنا, رغد,
ولا مسلسل عديل الروح عالاقل هم بس العيال بحرف الراء الام والابو مالهم علاقه..
ريما: والله ماانتبهت انه نفس الحرف بس كذا عاجبني الاسم
راكان: حتى عيالي من مرتي الثانيه بطقم فيهم بنفس الحرف
طق الباب عليهم ودخل نواف وخلود.. وبعد السلام والسوال عن الحال وتحمدوو لها بالسلامه..
راكان: يلاااا استلم اختك بروح اشوف رزقي
نواف: رزقك؟؟!!!!!
راكان: ايييييه تراك معزوم.. زواجي الاسبوع الجاي..
ريما: راكان تراك ذليتنا ماتسوى علي كلمه قلتها..
نواف: وش السالفه؟؟
راكان: تخيل اختك هاذي من يوم مادرت انها حامل وهي تقولي ياراكان تكفى لاتخليني لحالي اجلس جنبي لين اولد المهم اليوم دخلت معها غرفه الولاده طووولت جاهااا طلق موب صاحي ولا طلق صعايده أنا ملييت قلت اكييييييد اللحين بتجيب اربع مواليد ومعهم العرض ماغيره خذ واحد واحصل عالثاني مجانا.. اخووك مل الصراحه قلت بطلع جت ريما تمسكت فيني بغت تشق ثوبي تكفى لاتطلع لاتخليني اذا ولدت اطلع بكيفك ولو تبي بعد تزوج علي..
ريما تطالع فيه بنظرات حاده: اقووول نواف وين امي؟؟
خلود: خالتي بتجي بعد شوي..
نواف بحماس: ايووو ايووو كمل كمل.. ريما تراك ترفعين الضغط اسكتي شوي..
ريما ونفسيتها زفت بعد الولاده: واذا ماسكت يعني وش بتسوي بتعطيني كفين..
نواف: ايه والله نفسي اعطيك كفين ابرد حرتي فيك.. بس بعد اذن زوجك طبعا..
راكان بصوت واطئ: حلالك





ام مشاري: ساره ساره يلااااااا تاخرنا
ساره: طيب يمااا ثواني
نزلت ساره كاشخه عالاخر..
ام مشاري: سنه تلبسين..
ساره: يمااا العزيمه اللي احنا رايحين لها اليوم مهمه وزحمه وفيها ناس خليهم يشوفوني كذا يمكن يخطبوني..
ام مشاري وهي تضحك على هبال بنتها: انتي اثقلي شوي عشان الناس يخطبونك
ساره: يماااااا هذاك اول الناس يدورون البنت العاقله الثقيله المودبه.. اللحين غير صارو يدورون خفيفه الدم المهبوله اللي ترز عمرها وتكشخ..
ام مشاري: الله يصلحك بس امشي تاخرنا
ساره: قولي امييين يما
ام مشاري: اميييين على ايش بس
ساره وكنها استحت: لاا خلاص ولاشئ.. بس شئ في بالي
ام مشاري: ياليت نلاقي لنا وحده حليوه تصلح لمشاري..
ساره: يماااا انتي الان عندك امل فيه .. ملتزمه مايبي يقول تقعد تزعجني بالنصايح ووحده فري مايبي يقول عنها لعابه..
ام مشاري: الله يهديه..
ساره: يماااا تذكرين يوم فشلنا عند الناس اللي بالخرج يقول البنت جريئه يوم دخلت رفعت راسها وجلست تقز من قلب.. الله يعينيه على نفسه..





%% بعد مرور 8 سنوات%%

كلهم متواعدين يجتمعون الليله بالشاليهات مسوين حفله عائليه صغيره بمناسبه تخرج فارس من الجامعه تخصص " اعلام " ..

عبير معها.. شهد وفهد وولدها من سعود.. احمد
ريما معها رنا ورغد واللحين حامل
خلود مره نواف معها عبد العزيز ولمياء..
مها مره خالد معها جود وسلطان مسميه على اعز اصدقائه
ساره عمرها 26 والا الان ماتزوجت تنتظر فارس الاحلام ادعوو لها..



راكان واقف على باب سياره نواف..
راكان: انتبه زين خلك ماسك السيد اليمين
نواف وهو يهز راسه: ان شاء الله
راكان: كل شوي التفت عليها انتبه لها تكفى لان طريق الثمامه عارفه كله مطبات
نواف بملل: طيب
راكان يحرص عليه زياده: من اللحين قلي كانك ماراح تنتبه للطريق أنا اجيبها بعدين
نواف: يااخي تراك ازعجتنا أنت وحرمتك
راكان: وعيالك لايقربون منها تراها حامل وولدك حركته كثيرة
نواف: ماودك بعد اخلى عيالي بالبيت موب لازم يجون
راكان: نواف لاتستهبل ترى اتكلم معك جد ريما حامل وانا خايف عليها والله لو ماعندي دوام كان وديتها بس هي تبي تروح بدري معكم..
ريما: خلاص نواف افتح الباب بنزل
نواف: اقول انثبري بس بعد كل هالتعليمات بتنزلين..
راكان يغمز لريما: هيييييي أنت لاتقول لزوجتي انثبري..
نواف: ريما يلااااااا قفلي الباب الله يرحم والديك بنمشي
ريما: حبايبي رنا و رغد قولوا لبابا مع السلامه
خلود: عزوزي تعال قدام عندي....
نواف ويحرك يدينه: ليششش ليششش وراء وسع وتجيبينه بالضيق هنا مو يكفي لمو حاطتها بحظنك هو وين بتجلسينه؟؟؟!!!
خلود: حرام عليك اخاف يعور بطن ريما
عزوز: لاماما بجلس عند عمه ريما
وبعد مامشوا نواف يكلم خلود: أنا ماادري وش سويت بدنيتي ربي يبلاني باخت وزوج اخت قلق كذا..
عزوز: ماما بجي قدام عندكم
نواف بعصبيه: تعال قدام وانثبر هنا ولو تتحرك بشوتك برى السياره
خلود: اعصابك خوفت الولد
نواف: أنا بفهم ياريما اللحين الحمل الثالث وخايف عليك اجل الحمل الاول كان ياخذك المشاوير بطياره..
خلود: اذكر الله بتنظلهم..
ريما: الله اكبر.. قل اعوذ برب الفلق
دق جوال ريما ردت عليه وكان راكان..
ريما بابتسامه: هلا والله
راكان: وش اخبارك؟؟
ريما: تمام
راكان: هاااااااا كيف الطريق ؟؟..
ريما: إلا الان زين
راكان: انتبهي للبنات..
ريما: ان شاء الله..
راكان: يلاااااا تبين شئ
ريما: سلامتك
راكان: الله يسلمك.. مع السلامه
ريما: مع السلامه
وبما ان الطريق طويل جلسوا خلود وريما يسولفون ويضحكون ويعلقون عالناس..
خلود: شوفي السياره اللي قدامنا..
ريما: وااااااو شايلين بيتهم كله فوق السياره
نواف: طيب وش عليكم من الناس هم شايلين على ظهوركم
خلود: هههههه لابس احس سقف السياره بيطيح
نواف: وانتي ريما ماعندك ملاحظات عالسياره
ريما توها بتتكلم دق جوالها مره ثانيه..
راكان: مرحبا
ريما: اهلين..
راكان: وصلتوا؟؟..
ريما: لاباقي شوي
راكان: اذا وصلتوا اقبضي ارضك ولاتمشين المشي مو زين بالاشهر الاولى
ريما: طيب اتمرجح عادي؟؟..
نواف يدخل عرض يبي يرفع ضغط راكان: ايييييه عادي خذي راحتك وانا اللي بمرحجك..
راكان: وش يقول اخوك؟؟
ريما: ههههههههههههه لاولاشئ
راكان: المهم لااوصيك انتبهي لنفسك..
ريما: ان شاء الله بس لاتتاخر..
راكان: مع السلامه
ريما: مع السلامه

وبعد ماوصلوا لقوهم كلهم واصلين الحريم بشاليه والرجال بشاليه ثاني..

عند الحريم انواع الازعاج الاطفال منتشرين بكل مكان ومسوين ربشه..
خلود: امي تسلم عليكم..
الكل: الله يسلمك ويسلمها..
مها: ريهام كلمتني قبل مانطلع وكنت ابيها تجي بس ماقدرت؟؟..
ساره: ليش ماجت؟؟..
مها: زوجها مارضى.. احسه شديد شوي من ناحيه الطلعات
ساره: الله يرحم ايام اول يوم كانت بنت تطلع وتدخل على كيفها
عبير وهي تبتسم: دوام الحال من المحال
ام مشاري: وش اصغر عيالها هي؟؟!!

مها: سنتين..
ريما وهي داخله مع الباب: عبير شوفي عيالك يستقون على بناتي مو عشانهم كبار محد يقولهم شئ
عبير: اوووف تلقينها شهد العربجيه.. ولا فهد هادي بسم الله عليه
ام نواف: خلود انتبهي لعزوزي وين راح؟؟!!
خلود: شكله ياخاله راح عند الرجال..
ريما: اييييييه الحب كله لنواف وعياله وحنا مالنا رب
ام مشاري: ههههه لاااا ولد الولد غير..
ريما: اخبر الناس يحبون اول حفيد لكن انتي غير كل الناس.. لاانا عيالي محد يحبهم ولااحد يداريهم الله لنا..
ام نواف: والله كلكم احبكم انتم وعيالكم..
مها: واللـــــــــه من زمان مااجتمعنا..
ساره: بس اول جمعاتنا غير كان لها نكهه اللحين المكان طالع كنه فسحه مليان بزارين.. وكل وحده فيكم لاهيه بعيالها..
الكل: ههههههههههههههههه
ريما: اما فسحه ذي رهيبه..
ساره: وش اسوي من كثركم ماشاء الله مالقيت احسن من هالتعبير..
مها: احمدوا ربكم وقفت على كذا أنا اذا رحت لها البيت ماغير تعلق على عيالي
ساره: لامن جد أنا اشيل هم العشاء اذا جاء وين بيجلسون ذولااااااا
ريما: كل واحد عند امه
ساره: وش رايكم نقسمهم فرق وتصفيات والفايز اللي مايطلع نومينيه
الكل: هههههههههههههههههههههه
ام نواف: الله يرزقك يابنيتي الرجل الصالح اللي يسعدك قولي امييييين
ساره: اميييييين
مها: عيب.. اختشي
ساره: ريمااا تعالي نطلع نتمشى برى..
ريما: لااااا بناتي بيلحقوني وماراح استفيد خلينا هنا احسن
جلست ساره تتافف ومسكت الريموت تقلب القنوات..
عبير: مها الخاتم مره رهيب ماشاء الله الوانه حلوه.. أنا من زمان ادور خواتم زي هالنوعيه مالقيت.. من وين؟؟..
مها بابتسامه: والله هديه من خالد..
ام مشاري: عبير الاااا وش اخبار صديقتك نجلاء ماتزوجت؟؟
عبير: لااا والله ولا عندها نيه تقول بربي ولدي هو اللي بينفعني ..
ام نواف: الله يعين على هالدنيا محدا مرتاح فيها..




العصر وقبل غروب الشمس..
عند الرجال راكان توه واصل جاي من دوامه..
راكان: عقبال الدكتوراه ان شاء الله
فارس: تسلم والله
خالد: ماباقي الانشوفك عريس
ابو نواف: الله يرحم اخوي لو انه موجود كان فرح لك يمكن اكثر مني
الكل: الله يغفر له ويرحمه
ابو مشاري: بس ابو سعود مامات خلف رجال
سعود: تسلم والله ياعم
مشاري: فارس روتانا طرب طالبين مذيعين وش رايك؟؟
ابونواف: هذا اللي ناقص بعد
راكان: إلا صح فارس وين بتقدم؟؟
فارس: والله إلا الان ماقررت..
نواف: خلك مذيع بالقناه الرياضيه عشان نسمع خبر فوز الهلال منك..
راكان: جابهااااااا نواف تبشرنا بفوز الهلال
فارس: على طاري الهلال تعال أنت وش فيك خربت اختى من اول كنت أنا وياها نصراويين من اخذتك خربت افكارها وصارت هلاليه..
راكان: كيفي زوجتي وانا حر فيها اللي يحبه زوجها تحبه..
نواف: النصر يسمعون بالكأس ولاقد شافوه..
الكل: هههههههههههههههههههههههه
فارس: حدكم عاد إلى هنا وبس..
راكان: شف بتتزوج أنت وتجيب عيال وبتصير جد واحفادك بيصير عندهم احفاد والنصر توه حتى كاس مويه مامسكه
الكل: هههههههههههههههههههه
ابو نواف يحاول يفض الاشتباك: ههههههه وين ولدك ماشفناه اليوم
نواف: مدري والله اكيد يلعب مع الصغار..
راكان: وش فيك ياخال تسال عن ولد نواف ولا تسال عن عيالي .. والله ان المجلات كلهم يتهاوشون يبون صور عيالي عالغلاف بس أنا وريما نخاف عليهم من العين..
فارس: هههههه من العين كثر منها الاااااا تخافون تخرعون العالم؟؟
نواف: ياحليلك أنت المجلات يطلبونهم ياقدمك أنا وحده من نجمات هوليود داقه على تبي ولدي يمثل معها بفلمها الجديد..
ابو مشاري: عندي لكم خبر..
ابو نواف: خير اللهم اجعله خير
ابومشاري: خطبنا لمشاري رسمي وملكته الشهر الجاي
نواف: الف مبروك
مشاري: الله يبارك فيك
ابومشاري: مبروك..!!! عقب ماصك عمره الـ33 اللي كبره اللحين عنده كم ولد
خالد: ان شاء الله كل تاخيره فيها خيره
راكان: مبروك يامشاري..
مشاري: الله يبارك بعمرك
دق جوال خالد طلع من عندهم وكان المتصل سلطان..
خالد: هلا وغلا
سلطان: هلا بك
خالد: هاااااااا بشر وش صار عليك اليوم
سلطان: يارجال خلها على ربك.. يبون خبره خمس سنوات..
خالد: اااه الله يعينك ماتدري يمكن خيره..
سلطان: على قولتك يمكن ربي رادني عن شئ
خالد: تعال مرنا وسع صدرك حنا مجتمعين بالشاليه نبارك لفارس تخرجه..
سلطان: لااااا مااظن خلها مره ثانيه.. يلاااا تامرني على شئ يابو سلطان..
خالد: سلامتك..
سلطان: فمان الله
سكر خالد وكان باين عليه انه متضايق على حال صديقه سلطان اللي يعتبره اكثر من اخووو..
وبعد مادخل عندهم حس فيه نواف.....
نواف: سلامات خالد وش فيك ضايق صدرك؟؟
خالد: ابد والله توي مقفل من سلطان ضايق صدري عليه..
نواف: عسى ماشر..
خالد: تخيل من تخرجنا من ثمان سنوات تقريبا وهو يدور وظيفه.. اول شئ قعد سنه كامله عاطل بعدها لقى وظيفه بغير تخصصه داوم فيها كم شهر ومل.. واخر شئ توظف بشركه مقاولات قعد فيها سنتين وبعدها الشركه اعلنت افلاسها ومن بعدها وهو يدور له وظيفه والمشكله مسكين امه مزعجته تقوله تزوج تزوج وهو يقولي مين بيزوجني وانا ماعندي وظيفه..
نواف: والله ياخالد مشكله هالوظائف لها سنين ومو لاقين لها حل اجل من يصدق اختي ريما صيدلانيه متخرجه لها سنتين مالقت وظيفه...
خالد: بس اختك بنت ومتزوجه هذا رجال وراءه مسوليات...
نواف: والله حالته صعبه.. بس تدري أنا عندي مدقق قانوني اجنبي بعد اربع شهور بينتهي عقده خل يجي عندي الموسسه يداوم فيها ويكتسب خبره لما يروح الاجنبي نخليه يمسك مكانه..
جاء على جوال خالد مسج فتحه كان من سلطان..

" اضحك وكني رايق البال خالي..
والناس تحسدني وانا اموووت بسكات
اقضي نهاري بالمزح والتسالي
واسهر بليلي في هموم ومعانات
غريبه هالدنيا على كل حالي
الحزن دام والفرح بس لحظات.. "

رد عليه خالد بمسج كتب فيه..

" دنيا غريبه.. واخر الدرب عنوان..
والعمر رحله والتجارب رحايل
وانا كثر مالي من الناس خلان
اللي صفولي بالشدايد قلايل..
مرات ربك يرزقك خوه انسان
واحد ويسوي في عيونك قبايل.. "







النهـــــــــــــايه..



تمت بحمدالله..



اشـــــكركم عالمتـــابعـــــه.. واتمنى لكم دوام الصحة والعافية..

وعساني القاكم باذن الله وكلنا سالميـــــــن معافيــــــــن..



كتبت هذه الكلمات بعد نهايه القصه وقد سطرها قلبي قبل قلمي...
في البدايه اهدي القصه الى اغلى انسانه عندي امي الله يخليها لي..

دنيـــا غريبــــــه
اعتبرها جزء مني ومن حياتي غصت فيها وتفاعلت كثييييرا مع احداثها تساقطت دموعي لمصائبهم وحزنت معهم وشاركتهم فرحتهم في كل شئ... تفاصيلهم الدقيقه وحياتهم اليوميه كانت محور اهتمامي..

نواف كم بكيت لدخولك السجن بسبب لم تقترفه لكن لاتنسى ان الظلم ظلمات يوم القيامه
ان الابتلاء بمرض او سجن هذا كله مكتوب في صحائفنا قبل ان نولد فالواجب علينا الصبر والاحتساب

ساره اااااااه ياساره قلبي معك ادعووو لك بالتوفيق اصبري عزيزتي الصبر مفتاح الفرج... الفتاه التي لم تتزوج الى الان قد يكون هذه خيره لها من رب العالمين او يكون الله اراد منعها من شئ..

مشاري استفزني كثيرا ولم تروق لي حركاته الصبيانيه ولكن الله يمهل ولايهمل ان الاستهتار بالحياه سواء من الشاب او الفتاه يعود بالنهايه على الشخص نفسه
واعود واكرر ان الله يمهل ولا يهمل

عبير كم انتي مسكينه ياعبير كنتي متماسكه رغم كل الظروف التي مرت بك صوت انينك كل ليله كان يمزق قلبي ولكن الله عوضك وكافئك..
الطلاق ليس نهايه العالم بل على العكس ربما يكون هو طوق النجاه او قد يكون بدايه لحياه اجمل..

سعود الحياه مدرسه واظنك تعلمت ان الصراحه رغم مراراتها الا انها مفيده لكني اليوم اقول هنيئا لك قلب عبير وهنيئا لعبير حبك لها

وريما اغبطها حب راكان لها مهما تجاوزت بهم السنين ولكني اليوم حين انظر اليك اقووول هل هذه هي نفسها ريما؟؟.. لقد تغيرتي كثيرا عزيزتي اصبحت اكثر نضوجا..

مها انتي انسانه شفافه تفكرين بقلبك كثيرا وتدعين عقلك جانبا وهذا الشئ اوقعك في حرج كبير.. الكثير من مواقفك مع خالد قبل الزواج لم تعجبني ولكن المهم انك الان كونتي اسره وسعيده مع حبيب الماضي وزوج الحاضر

خالد الدنيا لعبت بك كثيرا فقدت امك ثم ابيك ومن بعدها تزوجت حبيبتك ورحلت عنك ولكن لله حكمه في كل شئ..وهاهي مها اليوم اصبحت الزوجه والحبيبه والصديقه والام اليس كذلك ياخالد؟؟!

فارس احمدالله ان سخر لك اخ شهم مثل نواف انقذك في بداية حياتك من الانحراف.. اما الان وقد كبرت واصبحت رجلا ليس امامي إلا ان ابارك لك التخرج واتمنى لك التوفيق في حياتك العمليه وعسى ان تحصل على وظيفه مع ان هذا اصبح من سابع المستحيلات في وقتنا هذا ولكن لعل تخصصك يشفع لك

وحتى الشخصيات الثانويه في القصه كانت ظروفهم وحياتهم الصعبه تأخذ مساحه من تفكيري

سلطان , خلود , نجلاء , ريهام , فيصل , وليد

اتمنى لهم حياه سعيده ومستقبل زاهر تتحقق فيه الامنيات


دنيــــــا غريبـــــه

وقفت كثيرا عند هذه الكلمه الجميع حولنا يقولون هذه العباره اذا حل بهم امر ما..
حاولت ان اجمع الاحداث الغريبه والمخيفه من حولي فعقدت العزم على التفكير بكل ماسمعت او رايت او قرات

وفي الاخير كان الثمره هذه القصه
في هذه السطور احببت ان اوضح ان الدنيا ليست حزن دائم ولا فرح متصل
حياتنا يتخللها العديد من المراحل والمفأجات والصدمات فــ " دوام الحال من المحال"

واحب اوجه كلمةالى كل انسان يظن ان الدنيا ضده ولاتنصفه...
الدرس الذي اريد الجميع يستفيده من هذه القصة واظن اولهم انا..
هو عسى ان تكرهوا شيئا وهو خير لكم..
لاتعلمون ربما لو دربكم اتجه الى اليسار بدل اليمين او الخلف بدل الامام سوف يكون لصالحكم..



تحيتي,,
مزاجييييييه كيوت..

اختـي مزاجييييييه :-

تعبتي روحكـ ...

ومشكـورهـ

كل التحية لكـ

!..{دلــ ع بــنــووتهـ}..!

مشكــوورهـ ـعلىـآ آلــرد..!!

مشكورة يا كيوت على القصة الطوووويلة
تقبلي مروري